WAZIRI wa Kilimo wa Tanzania Mhe Japhet Hasunga amemshauri Mdhibiti na Mkaguzi Mkuu wa Hesabu za Serikali (CAG) kufanya uchunguzi kwenye mfuko wa wakfu ambao ulikuwa wa kuendeleza zao la Korosho baada ya kubaini kuwepo na udanganyifu katika mfuko huo.
Maagizo hayo yanahusu kuchunguza kiasi cha Shilingi Bilioni 53.2 kilichobaki kwenye akaunti ya Mfuko wa wakfu wa kuendeleza zao la Korosho ambazo zilipangiwa Nazi ya kujenga viwanda vitatu vya kubangua korosho na maghala.
“Zipo fedha nyingine zimetumika kwenye vikao vya wadau karibia shilingi bilioni moja sasa tunataka tujiridhishe na matumizi ya hizo shilingi bilioni 53.2 zilizobaki,naelekeza CAG kufanya ukaguzi wa kina”alisema Mhe.Hassunga
Mhe Waziri ameunda timu ya watu wasiozidi watano kwa ajili ya kuhakiki kiasi cha korosho kilichopokelewa na kilichouzwa katika msimu wa Korosho wa mwaka 2018/2019 baada ya kubaini wa udanganyifu.
Hayo ameyasema leo jijini Dodoma mbele ya wandishi wa habari ambapo amezitaka pia kamati za ulinzi na usalama kusimamia zoezi la uhakiki ambalo linaonekana kutawaliwa na udanganyifu ambapo timu iliyoundwa itashirikiana na timu iliyokuwepo chini ya wizara hiyo kuhakiki pia fedha zilizopatikana ili wahakikishe wanaolipwa ni wale wanaostahili.
Aidha amesema timu hiyo ihakikishe kuwa majina yaliyotoka kwenye vyama vya msingi kwenda kwenye vyama vikuu hadi fedha zilizoingia benki kama kweli ziliingia kwenye akaunti za wakulima na kama kuna unyaufu uliojitokeza wabainishe ni kwa kiwango gani ili kusaidia serikali kutoa taarifa yenye uhalisia.
Waziri Hasunga amesema mwaka 2016 serikali iliamua kufuta mfuko wa Wakfu na kwenye akaunti kulikuwa na kiasi cha shilingi bilioni 53.2 lakini bodi ya Korosho iliamua kubadili matumizi na kutumia fedha hizo tofauti na maagizo yaliyotolewa na serikali.
” Kama Wizara hatupo tayari kuona ubadhilifu wowote wa fedha za umma unafanyika, Serikali ya awamu ya tano haiwezi kukubali kuona watu wachache wanafaidika na fedha za walipa kodi wa Tanzania.
Timu zote mbili naziagiza hadi kufikia Januari 15 mwaka 2020 wawe wameshatuletea ripoti wizarani. Niwahakikishie hatutomvumilie yeyote ambaye atajaribu kugusa fedha za wananchi, ” Amesema Waziri Hasunga.
Amesema bodi hiyo ilitumia kiasi cha shilingi bilioni 28.1 kununua viuatilifu,walitumia kiasi cha shilingi bilioni 12.2 kulipia magunia ilhali katika msimu huo wanunuzi walikuwa wananunua magunia wao wenyewe.
Ametoa wito kwa wakulima kuwa kama kuna anayedai ushirika apelike madai yao kwenye kamati ya ulinzi na usalama na timu iliyoundwa ili waseme kama hawajalipwa
